നമ്മുടെ വീട്ടിലെ ഗീസർ പെട്ടെന്നൊരു ദിവസം പ്രവർത്തിക്കാതായാൽ ഉടനെ മെക്കാനിക്കിനെ വിളിക്കേണ്ടതില്ല. പലപ്പോഴും ലളിതമായ ഒരു കാരണം കൊണ്ടായിരിക്കും ഇത് സംഭവിക്കുന്നത്.
എന്താണ് പ്രധാന കാരണം?
ഗീസറിലെ വെള്ളം അമിതമായി ചൂടാകുമ്പോഴോ വോൾട്ടേജ് വ്യത്യാസം വരുമ്പോഴോ സുരക്ഷയ്ക്കായി അതിലെ തെർമോസ്റ്റാറ്റ് (Thermostat) തനിയെ ഓഫ് ആകാറുണ്ട്. ഇതിനെയാണ് Auto Cut off എന്ന് പറയുന്നത്.
ഇത് എങ്ങനെ സ്വയം പരിഹരിക്കാം?
ആദ്യം ഗീസറിലേക്കുള്ള സ്വിച്ച് ഓഫ് ചെയ്യുക.
കട്ട് ഓഫ് സ്വിച്ച് എവിടെയാണ് കാണുക?
വിപണിയിലുള്ള ഗീസറുകളെ പ്രധാനമായും രണ്ടായി തിരിക്കാം. നിങ്ങളുടെ ഗീസർ ഏത് തരമാണെന്ന് മനസ്സിലാക്കി വേണം റീസെറ്റ് ചെയ്യാൻ:
പുറത്ത് കട്ട് ഓഫ് സ്വിച്ച് ഉള്ള ഗീസറുകൾ (External Reset)
ചില മോഡൽ ഗീസറുകളിൽ സുരക്ഷയ്ക്കും സൗകര്യത്തിനുമായി കവർ തുറക്കാതെ തന്നെ പുറത്തുനിന്ന് റീസെറ്റ് ചെയ്യാനുള്ള സംവിധാനമുണ്ട്.
സ്ഥാനം: ഗീസറിന്റെ അടിഭാഗത്തോ മുൻവശത്തോ ഒരു ചെറിയ സുഷിരം (Hole) കാണാം. ഇതിന് സമീപം 'Reset' എന്ന് എഴുതിയിട്ടുണ്ടാകും.
ചെയ്യേണ്ട വിധം: ഒരു ചെറിയ പ്ലാസ്റ്റിക് സ്റ്റിക്കോ അല്ലെങ്കിൽ ടെസ്റ്ററോ ഉപയോഗിച്ച് ആ സുഷിരത്തിലൂടെ ഉള്ളിലെ ബട്ടൺ സാവധാനം അമർത്തുക. 'ക്ലിക്ക്' എന്ന ശബ്ദത്തോടെ കട്ട് ഓഫ് റീസെറ്റ് ആകുന്നതാണ്. ഇതിനായി ഗീസറിന്റെ അടപ്പ് തുറക്കേണ്ട ആവശ്യമില്ല.
അകത്ത് കട്ട് ഓഫ് സ്വിച്ച് ഉള്ളവ (Manual Inside Reset)
ചില മോഡൽ ഗീസറുകളിൽ കട്ട് ഓഫ് സ്വിച്ച് ഗീസറിന് ഉള്ളിലായിരിക്കും.
സ്ഥാനം: ഗീസറിന്റെ അടിഭാഗത്തെ ചാരനിറത്തിലോ വെള്ളനിറത്തിലോ ഉള്ള പ്ലാസ്റ്റിക് കവർ സ്ക്രൂ ഡ്രൈവർ ഉപയോഗിച്ച് തുറക്കുക.
കണ്ടെത്തേണ്ട വിധം: കവർ തുറന്നാൽ സാധാരണ വയറുകൾ കണക്ട് ചെയ്തിരിക്കുന്ന തെർമോസ്റ്റാറ്റിന് മുകളിലോ വശത്തോ ആയി ഒരു ചെറിയ കറുത്ത ബട്ടൺ കാണാം. സാധാരണയായി ഇത് നിങ്ങളുടെ വലത് വശത്തായിരിക്കും (ഗീസറിന്റെ ഉള്ളിലെ ഇടത് ഭാഗം). ഈ ബട്ടൺ ഉള്ളിലേക്ക് അമർത്തുന്നതോടെ ഗീസർ കിട് ശബ്ദത്തോടെ റീസെറ്റ് ആവും
ശ്രദ്ധിക്കുക: ഗീസർ ഇടയ്ക്കിടെ കട്ട് ഓഫ് ആകുന്നുണ്ടെങ്കിൽ അത് തെർമോസ്റ്റാറ്റിന്റെയോ വയറിംഗിന്റെയോ തകരാർ മൂലമാകാം. അത്തരം സാഹചര്യങ്ങളിൽ ഒരു വിദഗ്ദ്ധ മെക്കാനിക്കിന്റെ സേവനം തേടുക.
Comments
Post a Comment